وأنا أراجع ارشيف الإميل للمواضيع المميزة وجدت هذا المقال الأبلغ من المحاضرات والندوات والمناقشات

الجماعة المحصورة!

بقلم محمد سلماوى

قالت الست تفيدة لزوجها الحاج أبوحسين: إلا قول لي يا حاج، جماعة مين دي بقي إللي محصورة دي؟ فرد عليها زوجها دون أن يرفع عينيه عن الجريدة التي يقرؤها: لا أعرف عما تتحدثين، قالت: شوفي ياختي الراجل! بقي طول النهار قاعد تقرا في الجرنال وتقول لي موش فاهم؟ طيب دي الجرايد والتليفزيون مالهومش شغلانة اليومين دول غير «الجماعة المحصورة» دي، يكونوش قصدهم جماعة الحاج أحمدين أبوكرش بتاع الطرشي إللي ورانا؟
قال لها زوجها: ماذا تقولين؟ قالت: أصل الولية نعيمة الهبلة جماعة الحاج أحمدين كل ما تشوفنا تطلع تجري، زي إللي خايفة نقوللها تعزم علينا بطرشي، نقوللها: رايحة فين يا نعيمة؟ تجز علي سنانها وتهز إيدها وتقول: داخلة دورة المية أصلي محصورة، لما بقت كل النسوان تقول عليها «نعيمة المحصورة».
لم يرد الحاج أبوحسين وظل يقرأ في جريدته فواصلت الست تفيدة: ديك النهار الولية أم عليوة إللي ساكنة قدامنا مرات أبوسريع الجزار شافت الحاج أحمدين قالت له: ألا يا حاج جماعتك علي طول محصورة ليه؟ قلت لها: يا ولية عيب كده! قالت لي: ما هي كل ما تشوفنا تطلع تجري وتقول محصورة، هو إحنا يعني عايزين منها حاجة؟ قلت لها: يمكن تكون عيانة ولا حاجة، إيش عرفنا، قالت: يبقي لازم هي بقي إللي بيقولوا عليها في الجرايد والتليفزيون، قلت لها: بيقولوا إيه؟ قالت: بيقولوا الجماعة المحصورة، إنت ماسمعتهاش؟ قلت لها: لا والنبي ماسمعتش، قالت: إزاي دول مالهومش شغلانة دلوقت غيرها، هي إللي طالعين فيها اليومين دول، علي طول «الجماعة المحصورة» راحت، «الجماعة المحصورة» جت.
ثم التفتت الست تفيدة لزوجها الذي لم يعرها أي اهتمام وقالت له: ما ترد يا راجل إنت، جماعة مين إللي محصورة دي، جماعة الحاج أحمدين بتاع الطرشي، ولا جماعة حد تاني؟ فلم يرد، قالت: ما داهية لتكون هي جماعة الحاج أحمدين.
فنظر زوجها إليها وهو يتنهد وقال: اتركيني في حالي اقرأ الجريدة، فقالت له: حقة لو كانت هي البت نعيمة الهبلة، دي تبقي سيرتها خلاص علي كل لسان، فنظر إليها زوجها وقال: المقصود هو الجماعة «المحظورة» وليس «المحصورة».
فردت تفيدة: ما هي دي! هو يعني لازم أنطقها لك بالنحوي، تبقي هي بقي جماعة الحاج أحمدين أبوكرش بتاع الطرشي، ففاض به الكيل وانفجر في زوجته: كرش إيه وطرشي إيه؟ المقصود هو الإخوان المسلمين، فضربت تفيدة علي صدرها وهي تقول: شوفي ياختي الراجل! إخوان إيه ومسلمين إيه؟ ما الإخوان المسلمين إحنا عارفينهم من زمان، أنا باسأل علي حاجة جديدة اسمها الجماعة المحصورة اللي طالعين فيها اليومين دول.
فقال زوجها: يا ستي الجماعة المحظورة هي الإخوان المسلمين، فقالت له تفيدة: خش في عبي خش! هو أنا تايهة عن الإخوان المسلمين؟ موش دول إللي خالك السني كان واحد منهم؟ قال لها وقد وضع جريدته جانبا: نعم خالي عبدالحميد الله يرحمه كان من الإخوان المسلمين، فقالت له تفيدة: طيب مادي حاجة قديمة، لكن أنا عايزة أعرف جماعة مين بقي إللي محصورة؟ قال لها زوجها: ما هم الإخوان المسلمين جماعة محظورة، يعني ممنوعة، قالت له: ممنوعة؟ شي الله يا سي ممنوعة! من إمتي بقي منعوها؟ موش هم دول إللي دخلوا مجلس الشعب وبيطلعوا علينا كل يوم في الجرايد والتليفزيون؟ قال لها زوجها في ضجر: أيوه يا ستي هم، قالت: طيب أمال إيه بقي إللي ممنوع؟ يا راجل روح كده بلا كلام فارغ، والله الولية أم عليوة كان عندها حق، مفيش واحدة محصورة غير هي الولية نعيمة الهبلة مرات الحاج أحمدين بتاع الطرشي، خليك إنت في الجرنال بتاعك موش عايزة منك حاجة، قال إخوان مسلمين قال!!